Sot shënohet Dita Botërore për Zhdukjen e Skllavërisë, e cila synon të tërheqë vëmendjen ndaj formave moderne të këtij fenomeni të rëndë, përfshirë trafikimin e qenieve njerëzore, shfrytëzimin seksual, punën e fëmijëve, martesat e detyruara dhe punën e detyruar në sektorë të ndryshëm.

Kjo datë lidhet me miratimin, më 2 dhjetor 1949, nga Asambleja e Përgjithshme e OKB-së, të Konventës për Zhdukjen e Trafikimit të Personave dhe Shfrytëzimit të Prostitucionit të të tjerëve.

Sipas Organizatës Ndërkombëtare të Punës (ILO), mbi 40 milionë njerëz në mbarë botën janë viktima të skllavërisë moderne, ndërsa rreth një e katërta prej tyre janë fëmijë. Gratë dhe vajzat përbëjnë shumicën e viktimave, veçanërisht në shfrytëzimin seksual dhe punën e detyruar.

Kjo ditë shërben si një thirrje e fortë për ndërgjegjësim dhe veprim global, në mbrojtje të dinjitetit njerëzor dhe të drejtave themelore të çdo individi.