Ylli brazilian Neymar do t’i nënshtrohet një operacioni në gju pas një sezoni të vështirë me Santosin, ku ndihmoi klubin të shmangë rënien nga elita e futbollit brazilian.

33-vjeçari luajti i dëmtuar dhe shënoi pesë gola në katër ndeshjet e fundit, duke luajtur një rol kyç në mbijetesën e ekipit, por tani i duhet pushim dhe trajtim mjekësor. Neymar nuk ka luajtur me përfaqësuesen e Brazilit prej dy vitesh për shkak të lëndimeve dhe mbetet e paqartë nëse do të jetë gati për Kupën e Botës 2026 në Kanada, Meksikë dhe SHBA.

Përzgjedhësi i Brazilit, Carlo Ancelotti, ka theksuar se Neymar duhet të rikthehet në formë të plotë për të siguruar një ftesë për turneun ndërkombëtar.