6104 kandidatë synojnë të jenë pjesë e Universitetit të Prishtinës “Hasan Prishtina” sivjet. Interesimi nëpër drejtime varion edhe nga kërkesat e tregut të punës, mirëpo në Fakultetin e Edukimit ka një ulje të dukshme të interesimit dhe kjo cilësohet si rrezik për sistemin arsimor në Kosovë.

Në një intervistë për gazetaren Arlinda Sejda të RTK-së, dekani në Fakultetin e Edukimit, Blerim Saqipi, ka thënë se kanë arritur në afatin e parë t’i plotësojnë të gjitha pozitat e lira. Mirëpo ulja e interesimit të të rinjve është evidente.

“Vitin e kaluar kanë qenë katër kandidatë për një vend të lirë, ndërkaq sivjet kemi dy kandidatë për një pozitë të lirë, në rast se do të jetë ky trend në vazhdim do të paraqes shqetësim për sistemin e arsimit për të plotësuar shkollat dhe nevojat e tyre me kuadro të mësimdhënësve”, ka thënë Saqipi për RTK.

Mirëpo një lajm i mirë në fushën e mësimdhënies është themelimi i nivelit të studimeve të doktoraturës. Kjo nismë vjen për herë të parë në Universitetin e Prishtinës si bashkëpunim me Universitetin e Lubjanës. Në mënyrë direkte kjo do të thotë ulje e kostos së shpenzimeve dhe alternativë për studentët shqiptarë, të cilët deri më tani kanë shkuar nëpër vendet përreth për të vazhduar studimet postdiplomike.

“Programi është inovativ edhe në kuptimin që ofrohet si program i përbashkët me diplomë të dyfishtë me Universitetin e Lubjanës, si i tillë paraqet një inovacion edhe për Universitetin e Prishtinës meqë është programi i parë i përbashkët i doktoratës”, ka deklaruar Saqipi.

Tutje dekani ka thënë se numri i studentëve të cilët do të pranohen do të jetë 10 për një gjeneratë.

 “Programi do të zgjas 3 vite si studime të rregullta dhe do të ofrohet në bashkëpunim me Universitetin e Lubjanës, një pjesë e përmbajtjes do të ofrohet nga kolegët e Lubjanës, ndërkaq monitorimi do të bëhet në mes dy palëve”, u shpreh ai./rtk/