Zëdhënësi i Agjencisë së Ushqimit dhe Veterinarisë (AUV), Lamir Thaçi, deklaroi se ky institucion ka mungesë të inspektorëve, derisa shtoi se ata shpeshherë punojnë edhe jashtë orarit të punës.

Sipas Thaçit, AUV-i përpiqet të ketë mbulueshmëri në tërë territorin e Kosovës, por sipas tij, numri i kufizuar i inspektorëve e vështirëson këtë.

“Kemi numër tejet të kufizuar të inspektorëve e ne i sforcojmë ndonjëherë të punojnë edhe jashtë orarit. E kuptojnë rëndësinë e veprimit karshi shëndetit të qytetarëve e s'po përtojnë të punojnë. Pos fushës së sigurisë mbulojmë edhe fusha të tjera”, deklaroi ai.

Sipas zëdhënësit të AUV-it, qytetarët duhet të bëjnë kujdes me ushqimet dhe të raportojnë menjëherë nëse shohin që produktet ushqimore që i blejnë, janë të prishura apo të pangrënshme.

Thaçi përmendi rastin kur janë asgjësuar 2.288 pashteta ditë më parë. Ai tha se pashtetat e dy lloteve s’i kanë përmbushur kushtet për konsum, me ç’rast inspektorët kanë reaguar.

“Raportimi ka ardhur nga rrjetet sociale. Ekipi inspektues ka shkuar dhe ka gjetur se në dy llote të prodhimit kemi hasur një defekt në proces të prodhimit dhe si shkak i kësaj ka ardhur te krijimi i mykut apo prishjes së produktit. E kur janë hapur (pashtetat) nga ekipet, është vërejtur shenja atipike të një produkti të rregullt, kundërmimi e edhe gjurmimi fizik, ka filluar kalbëzimi i produktit brenda konservës”, shtoi ai.

Sipas zyrtarit të Agjencisë, edhe qytetarët duhet të japin kontribut në sigurimin e ushqimit, derisa shtoi se incidentet në ushqim është normale të ndodhin por duhet të veprohet më kohë.

“Nga viti në vit kemi progres në rritje të sigurisë ushqimore. Ky progres po shkon edhe me rritje të vigjilencës së konsumatorëve...Prodhuesit në Kosovë janë të nivelit të Bashkimit Evropian”, tha Thaçi./koha/