Punësimi i personave me aftësi të kufizuara është e drejtë e garantuar edhe me ligj. Por, në praktikë kjo kategori e shoqërisë po përballet vazhdimisht me vështirësi në punësim. Sektori publik dhe ai privat vazhdojnë të mos e përfillin Ligjin për Punësimin e Personave me Aftësi të Kufizuara.

I tillë është rasti i Leontina Kastratit, e cila tash e dy vjet nuk po gjen punë, ndonëse ka përfunduar studimet Baçelor dhe vazhdon studimet Master në Fakultetin Filozofik.

Vitin e kaluar, Leontina ka aplikuar në konkursin për edukatore në Komunën e Drenasit, por ajo nuk është pranuar dhe për këtë ka edhe ankesa.

“Unë kam aplikuar në konkurse të ndryshme, si në nivelin qendror ashtu edhe në atë lokal. Kam apliku në Komunën e Drenasit, por nuk është marrë parasysh kërkesa ime. Tek ne nuk zbatohet ligji që është për aftësimin dhe riaftësimin për personat me aftësi të kufizuar”, tha Leonita për RTK-në.

RTK ka provuar të kontaktojë me Komunën e Drenasit për rastin në fjalë, si dhe për nivelin e zbatimit të Ligjit për Punësimin e Personave me Aftësi të Kufizuar, por ata nuk janë përgjigjur. Se ligji nuk po gjen zbatim e konfirmojnë edhe nga Handikosi.

“Punësimi vazhdon të mbetet shumë kompleks për personat me aftësi të kufizuar, ndonëse ekziston Ligji për punësim, aftësim dhe riaftësim profesional, por as institucionet e as kompanitë private nuk është që e respektojnë në përpikmëri këtë ligj”, tha Kaltërina Misini, zyrtare për komunikim në Handikos.

Përveç anës deklarative, mosrespektimi i ligjit vërehet edhe në shifrat e Agjencisë së Punësimit të Kosovës.

“Sipas raportit vjetor për vitin 2022 të Agjencisë së Punësimit të Kosovës, 10 persona me aftësi të kufizuar janë punësuar, kurse të papunë kanë qenë rreth 214”.

Shifra të vogla të punësimit janë evidente edhe këtë vit:  “Në Masat Aktive të Tregut të Punës ( MATP) kanë përfituar 4 persona me aftësi të kufizuara, ndërsa në aftësim profesional kanë përfituar 32 persona me aftësi të kufizuara deri në fund të muajit maj”, thuhet në raportin e Agjencisë së Punësimit të Kosovës.

Për zbatimin e ligjit si zgjidhje po shihet mbikëqyrja dhe gjobitja e institucioneve. Për mbikëqyrjen e institucioneve RTK ka provuar të marrë përgjigje nga Departamenti i Punës në Ministrinë e Financave, por deri në publikimin e këtij artikulli nuk kanë kthyer përgjigje./rtk/