Radio Plus 102.2 FM
call + 383 44 776 000
Dëgjo Radio Plus Live
Shumë rrugë në kryeqytet janë kthyer në shqetësim për qytetarët. Ata shpalosin vështirësitë që hasin çdo ditë për t’i kaluar ato, për shkak të gropave, ndërsa fajësojnë komunën për mosndërmarrjen e ndonjë veprimi për rregullimin e tyre. Ndërkaq, zyrtarë nga Komuna e Prishtinës premtojnë se shumë shpejt do ta zgjidhin këtë problem.
Qytetarët e Prishtinës ankohen se për shkak të gropave, po u dëmtohen veturat. Si më e dëmtuara vazhdon të jetë rruga "Agim Ramadani", e cila është ndër më të frekuentuarat në kryeqytet.
Derisa qytetarët ankohen se komuna nuk po e zgjidh këtë problem, drejtori i Investimeve Kapitale në Komunën e Prishtinës, Krenar Xhaferi, përmes telefonit, bën të ditur për RTK-në se së shpejti do të fillojë rregullimi i gropave.
“Sot janë nënshkruar kontratat e ndarjes zonale. Pra me ndarjen zonale, do të jenë gjashtë kontraktorë në krejt Prishtinën për mbylljen e gropave, shtresat qarkulluese dhe mirëmbajtjen e trotuareve”, tha Krenar Xhaferi, drejtor i Investimeve Kapitale në Komunën e Prishtinës.
Sipas Xhaferit, ky projekt do të fillojë nga e hëna, ku pritet të bëhen përgatitjet e nevojshme dhe të caktohen menaxherët e kontratave./rtk/