Kosova vazhdon të përballet me një mjedis të theksuar të ndotjes, përkundër ekzistimit të ligjeve të ndryshme për mbrojtjen e mjedisit. Sipas ekspertit të mjedisit, Agron Bektashi, niveli i ndotjes së mjedisit është mjaft serioz, e problemi më i theksuar është ndotja e ajrit, gjë që ndikon negativisht në shëndetin e qytetarëve.

“Qytetarët e Kosovës dallohen nga popujt e tjerë ballkanik për mirëmbajtjen e shtëpive dhe oborreve të tyre, por në momentin që dalin jashtë hapësirave private, nuk e kanë kujdesin e duhur për mjedisin”, tha Bektashi.

Kështu është konstatuar në disa raste nga ekspertë ndërkombëtarë që kanë analizuar gjendjen e mjedisit në Kosovë.

Ndërkohë, sipas ekspertit të mjedisit, Agron Bektashi, niveli i ndotjes së mjedisit në vend është mjaft serioz.

Në emisionin “Fokus” të Radio Kosovës Bektashi tha se shqetësues është niveli i ndotjes së ajrit.

“Ndoshta, me e shpërnda fajin për ndotjen dhe cilësinë e ajrit,  e them me bindje se përgjegjësia mund të ndahet me nga 33% ndërmjet KEK-ut, trafikut dhe formave të ngrohjes. Deri para 10-15 vjetësh, KEK-u ka dominuar në ndotjen e ajrit me rreth 50-60%, tash për shkak të mbipopullimit të Prishtinës dhe për shkak të ndërtimeve enorme që emetojnë sasi të madhe të pluhurit, gjendja ka ndryshuar ”, tha ai.

Sipas Bektashit, problem më vete është edhe ndotja nga pluhurat e deponive të mbetura nga metalet e rënda, prej rreth 3 dekadave në rajonin e Mitrovicës. Gjendja e tokës është paksa më e mirë, krahasuar me ndotjen e ajrit, theksoi Bektashi, teksa përmend ndotësit kryesorë.

“Toka në Kosovë i ka tri probleme me ndotjen. Problemi i pesticideve dhe plehrave artificiale, pastaj është ujitja e tokave nga lumenj të kontaminuar, posaçërisht nga lumenjtë Ibri, Sitnica, Llapi, Drenica. Mbeturinat dhe deponitë ilegale që hasen vend e pa vend. Normalisht, në pjesët ku është industri më e zhvilluar edhe nga shkarkimet e ndryshme të ujërave të zeza e jo vetëm”, tha ai.

Tutje, eksperti i mjedisit, Agron Bektashi, në Fokus të Radio Kosovës,  tha se përkundër nivelit të madh të ndotjes së mjedisit, ka shpresë për përmirësim të gjendjes, falë ngritjes së vetëdijes qytetare dhe ekzistimit të një kuadri të mirë ligjor për mbrojtjen e mjedisit në Kosovë./rtk/