Sivjet korrja e grurit është bërë më vonë se zakonisht për shkak të reshjeve të vazhdueshme të shiut. E kjo ndikoi edhe në cilësi, dhe në sasi.

Nga Shoqata e Mullisëve thonë se nuk do të ketë krizë të miellit në Kosovë.

Rreth 260 mijë tonë grurë pritet t’i sigurojë Kosova, nga 71 mijë e 8 hektarë të sipërfaqes së mbjellë me grurë.

Kështu ka bërë të ditur për RTK-në, drejtori ekzekutiv në Shoqatën e Mullisëve të Kosovës, Muhamet Farizi, sipas të cilit nuk do të ketë krizë të miellit. Por, pritjet e mullisëve për rendimente më të larta e cilësi sa më të mirë, nuk u arritën.

“Nga ajo sipërfaqe që është mbjell me grurë është pritur me shumë por tashmë është arrite një normale. Disa faktorë që kanë ndikuar edhe në cilësi edhe në rendiment janë : shiu, nxehtësia e tepërt pas shiut dhe e me pas edhe ndryshku si pasoje e nxehtësisë” ka thënë Farizi.

Pritjet për cilësi dhe rendiment i ka pasur edhe një fermer.

“Pritshmërinë e kam pasur në bazë qysh ka qenë bima e shëndoshë në pranverë edhe qysh ka qenë bimshmëria, mjaftueshme i kemi pasur mirëpo ndodhi qysh ndodhi kushtet klimatike kemi me 5 tonë e gjysmë për hektarë”, ka thënë  Valon Vehapi, bujk.

Profesori universitar, Imer Rusinovci thotë se gruri i sivjetmë nuk i plotëson standardet e miellit.

“Këtë vit kemi sasi të grurit që nuk e plotësojnë standardin edhe në sasi edhe në cilësi për miell për shkak se ishte një vit i tillë klimatik”, ka thënë Rusinovci.

Ministri i Bujqësisë, Faton Peci, pati thënë në fillim të fushatës së korrjes së grurit, se Kosova do të arrijë t`i mbulojë nevojat elementare të miellit./rtk/