Ai në një intervistë në emisionin “60 Minuta” në KTV, ka thënë se pas këtij rasti, të hënën kanë zhvilluar një takim me kryeprokurorin e Prokurorisë Themelore të Prishtinës, Kujtim Munishi.

Fushtica ka thënë se kanë kërkuar që të dinë se çfarë mund të bëjnë si kryeqytet në mënyrë që rastet e tilla të parandalohen dhe ka shtuar se Munishi u ka drejtuar disa kërkesa.

“Ne do të fillojmë që të bëjmë kontrolle më të rrepta me inspeksion nëpër lokale, kemi miratuar rishtazi rregulloren që parasheh që të gjitha lokalet të punojnë deri në orën 24:00, jemi në proces të implementimit të projektit për mbajtjen e matësve të zhurmës, ku kemi numër të madh të ankesave”, është shprehur Fushtica, duke thënë se do të rrisin edhe numrin e inspektorëve.

“Kryeqyteti do të ofrojë ndihmë dhe bashkëpunim, me inspektim, me institucionet e tjera të bëjë kontrollin, të gjitha këto raste ndodhin zakonisht në orët e vona, kryeqyteti të marrë përsipër kontrollin më të rreptë, më të mirë të orarit të punës, të veprimtarisë që ushtrohet në lokale, a është në përputhje me licencat, po ashtu edhe një kontroll më i mirë i klubeve të natës, që kanë leje të punojnë edhe pas orës 24:00”, ka shtuar Fushtica.

Fushtica: Te çdo e treta veturë që ndalohet pas orës 24 gjenden armë

Ai ka thënë se ka rritje të numrit të personave që bartin armë të zjarrit dhe armë të ftohta.

“Statistikat tregojnë që viteve të fundit kemi pasur përmirësim të situatës së sigurisë, por incidente të tilla e prishin imazhin e përgjithshëm të sigurisë, por mund të themi që kemi rritje të numrit të personave që mbajnë armë zjarri e edhe të atyre që mbajnë armë të ftohta, thika, kjo rezulton edhe nga kontrollet që bën Policia, numër i madh i tyre konfiskohet gjatë kontrolleve rutinë, posaçërisht pas orës 24:00, ndoshta te çdo i treti automjet që ndalohet nga Policia e Kosovës gjenden armë të zjarrtit apo armë të ftohta”, ka theksuar Fushtica, që drejton Drejtorinë e themeluar në mars të këtij viti.

Sipas tij në këtë gjendje kanë ndikuar politikat jo të duhura ndëshkuese për ata që mbajnë armë.

Ai ka thënë se kanë dashur që të gjejnë një mes në mënyrë që sektori i gastronomisë të mos pengohet, por ka thënë se do të rrisin numrin e inspektimeve për të parë nëse respektohen të gjitha obligimet ligjore, të cilat Komuna është përgjegjëse t’i mbikëqyrë.

“Prej sot do t’i adresojmë këto çështje dhe t’i koordinojmë aktivitetet në mënyrë që mos të kemi përsëritje të rasteve të tilla dhe të kemi një qytet të sigurt”, ka theksuar Fushtica, duke thënë se do të bëjnë gjithçka që është në përgjegjësinë e tyre për këtë.

Ai ka theksuar se kanë kërkuar prani më të madhe të policëve nëpër rrugët e kryeqytetit.

Nga të shtënat me armë zjarri të premten në lokalin “Bon Vivant” kanë mbetur të plagosur shtatë persona, njëri prej të cilëve vdiq më vonë në QKUK, ndërsa 13 të tjerë kanë pësuar lëndime trupore nga objekte të ndryshme./koha/