Pothuajse asnjë ditë çmimi i derivateve nuk është i njëjtë. Nga dita në ditë ato ndryshojnë në mënyrë drastike.

Derivatet kanë pësuar ngritje të lartë të çmimit.

Aktualisht një litër naftë nëpër pompat vendore mund ta marrësh me 1 euro e 47 centë.

Atyre që patjetër u duhet kjo lëndë djegëse, thonë se këto ngritje çmimesh janë të papërballueshme për standardin e Kosovës.

Ndërsa atyre që jetojnë në vendet e perëndimit, çmimi i derivateve u duket normal.

Ani pse në disa pika karburantesh çmimi është më i ulët, nga Shoqata e Naftëtarëve thonë se kjo ngritje e çmimeve me shumicë, ka ardhur për shkak të ngadalësimit të prodhimit ndërkombëtar të naftës.

Fadil Berjani kryetar i Shoqatës së Naftëtarëve të Kosovës, ka thënë se sa i përket standardit tonë ekonomik çmimet normal për qytetarë janë të larta.

Çmim real kishte mundur të ishte 1 euro për standardin çfarë i kemi. Këto çmime i cakton berza OPEC dhe për shkak të reduktimit të prodhim kemi ngritje të çmimit", ka thënë Berjani.

Berjani thotë se vendimi i Ministrisë së Industrisë që përcakton marzhën e fitimit te naftëtarët është duke u respektuar.

Ndërkohë për këtë, në një përgjigje përmes telefonit për RTK-në, zyrtarët e MINT-it thanë se janë duke i inspektuar të gjitha subjektet që merren me tregtimin e naftës.

“Inspektorati i Tregut në bashkëpunim me Inspektoratin e ATK-së janë terren duke i inspektuar të gjitha subjektet që merren me tregtimin e naftës. Inspektor e ATK si autoritet kompetent për llogaritjen e marzhës tregtare mbi bazën e të dhënave nga terreni janë duke konstatuar nëse subjekt ekonomike janë duke ju përmbajtur vendimit të MINT. Në varësi nga gjetjet e inspektoratit të ATK-së, inspektorët e tregut do të ndërmarrin të gjitha masat ligjore për të penalizuar të gjitha subjektet që nuk kanë respektuar vendimin e MINT”, thuhet në përgjigjen e Ministrisë së Industrisë dhe Tregtisë.

Nga MINT po ashtu thanë se gjatë javës së kaluar, çmimi i furnizimit është rritur ndjeshëm. Sipas tyre, pikërisht vendimi i kësaj ministrie e ka parandaluar një rritje joproporcionale në tregun e brendshëm.