“Në kontekstin sfidues global, kushtet makroekonomike në Kosovë për vitin 2023 kanë mbetur të favorshme, derisa rritja vazhdon të jetë reziliente, inflacioni vazhdon të shënojë rënie dhe deficiti i llogarisë rrjedhëse ka filluar të ngushtohet”. Kështu ka deklaruar Gabriel Di Bella, përfaqësues i Fondit Monetar Ndërkombëtar (FMN), i cili bashkë me një ekip të këtij institucioni realizuan një vizitë në Prishtinë, nga 31 korriku deri më 4 gusht 2023.

Ky grup i FMN-së ka ardhur në Kosovë për të diskutuar lidhur me zhvillimet e fundit makroekonomike dhe zhvillime të tjera, përfshirë progresin në zbatimin e Marrëveshjes parandaluese Stand-By (SBA) dhe Instrumentit të Reziliencës dhe Qëndrueshmërisë (RSF).

“Të hyrat fiskale vazhdojnë të rriten me ritëm të qëndrueshëm, ka filluar të rritet zbatimi i programit të investimeve publike dhe rezervat fiskale kanë mbetur në nivele të duhura. Megjithatë, paqëndrueshmëria e ngritur në nivel global dhe tensionet në Kosovën veriore mbeten rreziqe perspektive të cilat, nëse materializohen, mund t’i rëndojnë sfidat e politikave”, ka deklaruar Di Bella.

“Në veçanti, zhvillimet e kohëve të fundit në katër komunat veriore çuan në masa të përkohshme dhe të kthyeshme nga disa donatorë dhe partnerë tradicionalë që kufizojnë bashkëpunimin e ri ekonomik dhe financiar. Përderisa, nëse hiqen në afat të shkurtër, nuk pritet që këto masa të kenë ndikim në perspektivën ekonomike, ato mund të bëhen pengesë për investimet e huaja direkte dhe zhvillimin ekonomik në përgjithësi nëse vazhdojnë të qëndrojnë për një kohë më të gjatë”, konsideron ai, njofton FMN.

Gjatë vizitës, ekipi i FMN-së thuhet se ka diskutuar për zhvillimet e fundit makroekonomike dhe të politikave, si dhe progresin me projektbuxhetin për vitin 2024.

“Ekipi gjithashtu vlerësoi progresin e shënuar në përmbushjen e angazhimeve kryesore në kuadër të programeve të mbështetura nga Fondi. Veprimet nën SBA dhe RSF do të vlerësohen zyrtarisht gjatë misionit të parë të shqyrtimit që pritet të zhvillohet në muajin tetor”, thuhet në njoftimin e FMN-së.

Ekipi i këtij institucioni ka mbajtur takime me përfaqësuesit e institucioneve të Kosovës, por edhe me dikasteret e qeverisë që merren me çështje ekonomike e financiare./rtk/