Një nga marrëveshjet më të mëdha në historinë e modës italiane u nënshkrua dje(10.04.2025) : Prada ka arritur një marrëveshje prej 1.375 miliardë dollarësh për të blerë rivalin më të vogël Versace nga kompania Capri Holdings, duke përfshirë edhe borxhin e saj.

Ky bashkim i dy ikonave të modës përfaqëson një përpjekje të fortë për të rritur ndikimin e Italisë në industrinë luksoze globale, e cila aktualisht dominohet nga gjigantët francezë si LVMH (pronari i Louis Vuitton).

Ndërkohë që Prada ka sfiduar rënien e kërkesës për produkte luksoze, Versace ka operuar me humbje në tremujorët e fundit. Marrëveshja u finalizua vetëm pak javë pasi Donatella Versace njoftoi largimin e saj si drejtoreshë kreative e markës që u themelua nga i ndjeri Gianni Versace.

"Qëllimi ynë është të vazhdojmë trashëgiminë e Versace duke e rishkruar estetikën e saj të guximshme dhe të përjetshme", – tha Patrizio Bertelli, Kryetari i Prada-s dhe bashkëshorti i dizajneres Miuccia Prada.

Nga ana tjetër, Donatella u shpreh e lumtur për këtë hap të ri:

"Gianni dhe unë gjithmonë kemi pasur admirim për Miuccia-n dhe Patrizio-n. Jam e nderuar që marka gjendet në duar të sigurta dhe jam gati të jap mbështetjen time në këtë epokë të re".

Një marrëveshje me çmim të ulët

Vlera e tanishme e marrëveshjes është dukshëm më e ulët se ajo e vitit 2018, kur Capri Holdings (atëherë i njohur si Michael Kors) pagoi rreth 2.15 miliardë dollarë për të blerë Versace nga familja dhe kompania investuese Blackstone. Kjo lëvizje pason një periudhë të paqëndrueshme në tregjet financiare për shkak të tensioneve tregtare dhe tarifave të reja nga SHBA.

Për Prada-n, që nga blerjet e diskutueshme në fund të viteve '90 si Helmut Lang dhe Jil Sander, kjo është marrëveshja më e madhe që prej kohësh – një rikthim strategjik në skenën ndërkombëtare të blerjeve.

Versace, me printet e saj të guximshme dhe stilin barok, do t’i japë Prada-s një tjetër dimension të klientelës. Ndërsa Prada, e njohur për stilin minimalist dhe elegancën e saj të heshtur, do të ofrojë një platformë të fortë për rritjen dhe stabilizimin e Versace në vitet që vijnë.