Rihanna ka surprizuar publikun sërish, duke konfirmuar shtatzëninë e saj të tretë në tapetin e kuq të Met Gala 2025. E veshur me një kostum me vija të dizajnuar nga Marc Jacobs dhe një kravatë me pika, këngëtarja dhe themeluesja e Fenty Beauty mbërriti e fundit në eventin që sivjet kishte si temë “Superfine: Tailoring Black Style”.

Partneri i saj, reperi A$AP Rocky – i cili ishte bashkë-prezantues i ngjarjes – u shfaq disa orë më parë në një veshje të stiluar nga vetë ai, frymëzuar nga filmi “Harlem Nights”. Ai konfirmoi për Reuters se lajmi për shtatzëninë “është një ndjesi fantastike për ta ndarë pikërisht këtu”.

Çifti tashmë ka dy djem së bashku dhe është bërë i njohur për mënyrat e veçanta se si ndajnë momentet e tyre personale me publikun. Rihanna, e cila njihet për guximin dhe stilin e saj të veçantë gjatë shtatzënive, ka vendosur standarde të reja në modën e maternitetit, duke u shfaqur me veshje që theksojnë dhe festojnë ndryshimet e trupit të saj.

Tapeti i kuq i Met Gala-s është kthyer në një vend simbolik për njoftime të tilla, me yje si Serena Williams dhe Karlie Kloss që më parë kanë bërë të njëjtën gjë.