Sipas analizave të Informa Connect Academy, Elon Musk mund të arrijë një pasuri neto prej 1 trilion dollarësh deri në vitin 2027, duke u bërë kështu miliarderi i parë në histori që kalon këtë shifër. Aktualisht, Musk mbahet si personi më i pasur në botë me një vlerë neto rreth 420 miliardë dollarë dhe një rritje mesatare vjetore prej 110%.

Pasuria e tij është kryesisht e lidhur me Tesla-n, ku zotëron 13% të aksioneve, dhe përfitimet nga opsionet e aksioneve që janë pjesë e paketës së tij kompensuese. Ekspertët besojnë se zhvillimi i teknologjisë së automjeteve vetëdrejtuese dhe projekti për Robotaxi mund të jenë faktorë kyç që do e çojnë pasurinë e Musk përtej shifrës së trilionit.

Përveç Tesla-s, Musk ka interesa të mëdha edhe në SpaceX, xAI, The Boring Company, Neuralink dhe platformën sociale X. Megjithatë, sfidat si problemet me rregullatorët, thirrjet për kthim të makinave, dhe polemikat rreth X vazhdojnë të jenë pjesë e sfidave të tij.

E ardhmja e pasurisë së Musk do të varet shumë nga performanca e Tesla-s dhe aftësia e tij për t’u përshtatur me sfidat e vazhdueshme në treg.