Kompania suedeze e automjeteve, Volvo Cars, ka njoftuar një plan për shkurtimin e rreth 3 mijë vendeve të punës, kryesisht në pozita administrative dhe zyra në Suedi. Këto përbëjnë rreth 15% të fuqisë punëtore të saj në këtë sektor. Kjo masë është pjesë e një plani më të gjerë për uljen e kostove, që Volvo e kishte prezantuar muajin e kaluar, me një buxhet prej 18 miliardë korona suedeze (rreth 1.9 miliardë dollarë amerikanë).

Industria globale e makinave po përballet me sfida të mëdha, duke përfshirë tarifat e larta të vendosura nga SHBA për importet, kostot e rritura të materialeve dhe një ngadalësim të shitjeve në tregjet kryesore evropiane. Shefi ekzekutiv i Volvo Cars, Håkan Samuelsson, deklaroi se kjo është një periudhë sfiduese për industrinë dhe se këto vendime, edhe pse të vështira, janë të nevojshme për të ndërtuar një Volvo më të fortë dhe më të qëndrueshëm në të ardhmen.

Volvo Cars, me seli në Gothenburg të Suedisë, ka fabrika të prodhimit në Suedi, Belgjikë, Kinë dhe SHBA. Kompania, e cila u ble nga gjiganti kinez Geely Holding në vitin 2010, kishte premtuar më parë që të kalonte plotësisht në prodhimin e veturave elektrike deri në vitin 2030, por planet janë zbehur për shkak të pasigurive të reja, përfshirë tarifat ndaj automjeteve elektrike në tregjet kryesore.

Në të njëjtën kohë, edhe Nissan ka njoftuar për shkurtime masive prej rreth 20 mijë vende pune në nivel global. Ndërkohë, konkurrenca në tregun e makinave elektrike është bërë gjithnjë e më e ashpër, me kompani si BYD që kanë ulur çmimet për më shumë se 20 modele të tyre, çka ka detyruar edhe rivalët si Changan dhe Leapmotor të ndjekin shembullin.

Industria e makinave mbetet një nga sektorët më të ndërlikuar dhe më sfidues të ekonomisë globale, me përballje të forta në tregje, rënie të shitjeve dhe trysni të vazhdueshme për inovacion.