Këngëtarja e njohur Olivia Rodrigo ka reaguar ashpër ndaj bastisjeve të emigracionit të urdhëruara nga presidenti amerikan Donald Trump në qytetin e saj të lindjes, Los Angeles.

Rodrigo, gjyshërit e së cilës nga babai emigruan nga Filipinet në SHBA, dënoi veprimet e agjencisë ICE përmes një deklarate në Instagram:

“Kam jetuar gjithë jetën time në LA dhe jam thellësisht e tronditur nga këto dëbime të dhunshme të fqinjëve të mi. Los Angeles nuk do të ekzistonte pa emigrantët.”

Bastisjet e fundit të ICE kanë shkaktuar protesta të ashpra, të cilat çuan në vendimin e Trump për të dërguar Forcat Detare dhe Gardën Kombëtare për t’i shtypur. Kjo lëvizje është kritikuar gjerësisht, përfshirë edhe nga guvernatori i Kalifornisë, Gavin Newsom, i cili e quajti ndërhyrjen ushtarake një “fantazi të çmendur diktatoriale”.

Këngëtarja e hitit Vampire shprehu solidaritetin e saj me komunitetin emigrant:

“Të trajtosh anëtarë të ndershëm të komunitetit me kaq pak respekt dhe pa proces të rregullt ligjor është e tmerrshme. Qëndroj në krah të komunitetit të bukur e të larmishëm të LA-së dhe të gjithë emigrantëve në Amerikë. Qëndroj për të drejtën tonë për liri fjale dhe të drejtën për të protestuar.”