Michael Madsen, i njohur për qëndrimin stoik dhe interpretimet e tij të paharrueshme, ka vdekur në moshën 67-vjeçare pas një arrestit kardiak. Publicistja e tij, Liz Rodriguez, konfirmoi për CNN se aktori u gjet i pajetë në shtëpinë e tij në Malibu të enjten në mëngjes.

“Michael Madsen ishte një nga aktorët më ikonikë të Hollivudit, që do të na mungojë shumë,” thuhet në deklaratën e përbashkët të menaxherëve të tij, Susan Ferris dhe Ron Smith nga Bohemia Entertainment, si dhe të publicistes Rodriguez.

Autoritetet policore të Los Anxhelosit konfirmuan se nuk dyshohet për ndonjë element të paligjshëm.

Një karrierë e jashtëzakonshme

Michael Madsen do të mbahet mend për rolet e tij në disa nga filmat më të spikatur të Tarantinos, përfshirë “Reservoir Dogs”, “Kill Bill” dhe “Once Upon a Time… in Hollywood”. Ai u dallua për një pamje të qetë, të ftohtë dhe shpesh kërcënuese, duke interpretuar me mjeshtëri si personazhe negative ashtu edhe protagonistë më të butë, si në filmin “Species” të vitit 1995.

Rrugëtimi i tij artistik nisi në fillim të viteve ’80 me rolet televizive, ndërsa fama iu rrit me pjesëmarrjen në filmin “Thelma & Louise” në vitin 1991, ku luajti përballë Susan Sarandon. Vetëm një vit më pas, ai realizoi bashkëpunimin e parë me Tarantinon në “Reservoir Dogs”, ku roli i Mr. Blonde mbetet një ndër më të njohurit në karrierën e tij.

Gjatë viteve, Madsen mori pjesë në shumë filma aksion dhe western, duke përfshirë “Wyatt Earp” në vitin 1994, si dhe projekte më të mëdha si “Donnie Brasco” (1997), “Die Another Day” (2002) dhe “Sin City” (2005). Ai vazhdoi të përforconte famën e tij si një “i lig” i talentuar në serinë “Kill Bill” dhe më vonë në “The Hateful Eight” të vitit 2015.

Përveç filmave të njohur, Madsen la gjurmë edhe në filma më të vegjël të pavarur, duke sjellë energji dhe karakter të fortë në çdo rol.

Jeta personale dhe sfidat

Jeta private e Madsen nuk ka qenë pa probleme. Ai është arrestuar disa herë, përfshirë për akuza për dhunë në familje dhe për drejtim të automjetit në gjendje të dehur. Në vitin 2022, aktori humbi djalin e tij Hudson, i cili kreu vetëvrasje, një tragjedi që e goditi thellë.

Vetë Madsen kishte treguar hapur për luftën me varësitë dhe vështirësitë personale, duke pohuar se fama shpeshherë e kishte lodhur dhe i kishte sjellë sfida të paparashikuara.

Projektet e ardhshme

Edhe pse sot nuk është më mes nesh, Madsen la pas një trashëgimi të madhe krijuese, me mbi 320 role të regjistruara në IMDb dhe plot 18 projekte në zhvillim në momentin e vdekjes. Ndër to përfshihen filmat “Resurrection Road”, “Concessions” dhe “Cookbook for Southern Housewives”, si dhe komedia “Saturday at the Starlight” dhe filmi për mafiozë të moshuar “Oldfellas”.

Madsen po përgatitej gjithashtu të publikonte një libër me poezi dhe reflektime personale, të titulluar “Tears For My Father: Outlaw Thoughts and Poems”.

Edhe pse nuk do të mund të shohim më interpretimet e tij të reja drejtpërdrejt, pritet që rolet e tij të fundit të mbeten një testament i qartë i talentit të tij të pakontestueshëm.