Prishtina inauguron skate parkun e parë për të rinjtë dhe sportdashësit

Vendi | 16.07.2025 Ora 8:02

Komuna e Prishtinës ka njoftuar se më 17 korrik do të inaugurohet Skate Parku i parë në kryeqytet, duke ofruar një ambient modern për sportdashësit dhe të rinjtë.

Hapja zyrtare do të mbahet të enjten, më 17 korrik, në orën 20:30, pranë Shkollës “7 Marsi” në lagjen Kalabri. Në ceremoni do të jenë të pranishëm Kryetari i Prishtinës, Përparim Rama, dhe Drejtoresha e Hapësirave Publike dhe Parqeve, Donika Çetta.

Ngjarja do të shoqërohet me muzikë live nga një DJ, si dhe performanca nga skaterë dhe biçiklistë, duke krijuar një atmosferë urbane dhe energjike.

"Ftojmë të gjithë qytetarët, të rinjtë, sportdashësit dhe artdashësit që të bashkohen me ne për hapjen zyrtare të Skate Parkut të parë në Prishtinë, në zemër të Kalabrisë! Ejani ta festojmë së bashku hapjen e një hapësire të re për rini, liri dhe lëvizje!", thuhet në njoftim.