OpenAI ka prezantuar një funksion të ri për ChatGPT të quajtur “agent mode”, që e transformon chatbot-in në një ndihmës virtual me aftësi për të kryer detyra konkrete në vend të përdoruesit.

Ky funksion u mundëson përdoruesve të pajtimeve Pro, Plus dhe Team t’i japin komanda komplekse si: “shiko kalendarin tim dhe përgatit një përmbledhje të takimeve sipas lajmeve të fundit” apo “planifiko dhe bli përbërës për një mëngjes japonez për katër persona”.

Agjenti funksionon përmes një kompjuteri virtual të integruar dhe kombinon mjetet ekzistuese të ChatGPT – si Operator (që kërkon në web) dhe Deep Research (që analizon përmbajtje të gjerë për të përpiluar raporte).

Megjithatë, OpenAI ka vendosur kufizime të qarta për të shmangur abuzimet, përfshirë ndalimin e veprimeve të rrezikshme si transferet bankare. Përdoruesi duhet të konfirmojë veprimet më të ndjeshme, si dërgimi i e-maileve apo aksesi në të dhëna personale.

CEO i OpenAI, Sam Altman, e ka përshkruar këtë risi si një “shije të së ardhmes”, por me paralajmërimin që përdoruesit të jenë të kujdesshëm derisa teknologjia të përmirësohet më tej.