Pas reagimeve dhe polemikave të stuhishme që u shfaqën në rrjetet sociale për shkak të mënyrës se si Lamine Yamal festoi ditëlindjen e tij të 18-të, babai i tij Mounir Nasraoui tha fjalën e tij, duke mbrojtur sulmuesin e Barcelonës.

Në një deklaratë për mediat spanjolle, ai e mbrojti qartë të birin, duke hedhur poshtë të gjitha akuzat dhe kritikat që pasuan festën e ditëlindjes. Ylli i ri i Barcelonës dhe ekipit kombëtar spanjoll organizoi një festë private ku, ndër të tjera, performuan artistë shtatshkurtër.

Ky fakt shkaktoi komente të shumta negative, dhe disa e quajtën festën pa shije dhe poshtëruese. Mounir Nasraoui, i njohur edhe për deklaratat e tij ekscentrike gjatë Kampionatit Evropian 2024, tërhoqi sërish vëmendjen e publikut. “Djali im është një shembull për shumë fëmijë. Ai nuk bëri asgjë të gabuar. Njerëzit do të vdesin nga xhelozia. Nëse ai do të bënte diçka të gabuar, unë do të isha i pari që do të reagoja.

Por ai nuk e bëri. Nëse dikush mendon se është, le të shkojë në gjykatë, le të ngrejë një padi. Dhe ata që e fyejnë, le të shihen së pari në pasqyrë”, ka thënë fillimisht Nasraoui. Ai shtoi se djali i tij, megjithëse është atlet profesionist, mbetet një i ri që ka të drejtë të argëtohet. “Ai është ende fëmijë. Ai ka të drejtë të gëzohet dhe të festojë. Nuk mund ta ndalojmë, sepse është i famshëm.

Nëse e ka kaluar vijën, ka institucione që do të reagojnë. Por unë po ju them: ai nuk bëri asgjë të gabuar”.Babai i njërit prej talenteve më të mëdha të futbollit të sotëm tha se Lamine dëshiron të jetë një model pozitiv për brezin e tij, por edhe më gjerë. “Ai përpiqet të jetë shembull, jo vetëm për veten, por edhe për të tjerët. Ne duhet të jemi krenarë për të, jo ta kritikojmë”, përfundoi babai i Yamal. Lamine Yamal nuk iu përgjigj kritikave ndërsa përgatitet për sezonin e ri me gjigantët katalunas, por nuk ka dyshim se lëvizjet e tij të ardhshme do të jenë nën shqyrtim.