Në një konferencë të përbashkët mes Komunës së Prishtinës dhe NP “Termokos” SH.A., u prezantua Studimi i Fizibilitetit për mbulueshmërinë e Prishtinës me ngrohje qendrore. Kryeshefi Fisnik Osmani dhe kryetari Përparim Rama diskutuan rreth kapaciteteve ekzistuese, projekteve në proces si “Solar4Kosovo” dhe dyfishimi i kapaciteteve, si dhe nevojën për investime të mëdha për të mbuluar të gjithë qytetin.

Studimi analizon 13,900 ndërtesa me mbi 3 milion m² sipërfaqe banimi në 141 lagje të kryeqytetit. Për mbulimin e plotë janë të nevojshme mbi 150 km tubacione dhe 9,423 pika kyçjeje. Për pjesën veriore, opsionet teknologjike përfshijnë impiante me kogjenerim (gaz ose biomasë), ndërsa për pjesën jugore – rezervuarë sezonalë dhe pompa termike.

Kostoja totale e investimit kap vlerën e rreth 250 milionë eurove. Sipas drejtorit Osmani, janë ndërmarrë hapa të parë drejt sigurimit të fondeve për këtë projekt madhor, që pritet të përmirësojë jetën e qytetarëve dhe cilësinë e ajrit në Prishtinë.