Sipas Shërbimit të Shpëtimit Alpin Veneto (CNSAS), për të shpëtuar burrin u përdorën dy helikopterë dhe mbi një duzinë specialistësh, pasi ai u bllokua në një zonë ku ndodhi rrëshqitje dheu, në lartësi prej 2,400 metrash.

Ngjarja ndodhi vetëm pak ditë pasi dy alpinistë belgë në të njëjtën zonë u shpëtuan me një kosto më të ulët, për shkak të përfitimeve si qytetarë të Bashkimit Evropian – një fakt që e bën edhe më të dukshme pasojën financiare të Brexit për britanikët në rastet emergjente.

Kjo verë ka qenë më e rënda në dekada në Alpet italiane, me mbi 80 viktima brenda një muaji, për shkak të kushteve ekstreme të motit si stuhi të papritura, përmbytje dhe rrëshqitje dheu. Pesë persona vazhdojnë të jenë të zhdukur.

Zyrtarët lokalë kanë paralajmëruar turistët që të respektojnë sinjalizimet dhe të përgatiten mirë para udhëtimeve në male, ndërsa rrugët më të rrezikshme janë mbyllur përkohësisht.

Komisioneri lokal i shëndetësisë Giuseppe Dal Ben tha se "helikopterët nuk janë taksi dhe rrezikimi i ekipeve të shpëtimit për shkak të papërgjegjshmërisë së individëve është i papranueshëm."