Kelley Mack, e njohur për rolin e Addy-t në sezonin e nëntë të serialit The Walking Dead, ka ndërruar jetë në moshën 33-vjeçare pas një beteje me gliomën e sistemit nervor qendror. Ajo u nda nga jeta në Cincinnati, qytetin e saj të lindjes.

Përveç rolit në serialin e njohur, Mack u shfaq edhe në produksione të tjera televizive si 9-1-1 dhe Chicago Med, si dhe dha zërin për personazhin Gwen Stacy në projektet e Spider-Man: Into the Spider-Verse. Ajo ishte pjesë e fushatave reklamuese për marka të njohura si Dr Pepper, Budweiser, Rakuten e të tjerë.

Në kinematografi, ajo spikati në filmin Broadcast Signal Intrusion (2021), Delicate Arch (2024), dhe në Universal (2025), për të cilin ishte edhe producente ekzekutive.

E rritur në disa shtete të SHBA-së, Mack kishte diplomë në kinematografi nga Universiteti Chapman dhe më herët kishte fituar çmime për aktrim nga shkolla Tisch e NYU-së. Ajo bashkë-shkruante skenare me nënën e saj dhe kishte pasione të shumta si tenisi, ecjet në natyrë, piano, futbolli fantastik dhe koleksionimi i lodrave pellushi.

Pas vetes la prindërit, vëllezërit e motrat, gjyshërit dhe të dashurin. Një ceremoni përkujtimore do të mbahet më 16 gusht në Glendale, Ohio, ndërsa një tjetër do të organizohet në Los Angeles.