Apple ka njoftuar një tjetër investim gjigant prej 100 miliardë dollarësh në Shtetet e Bashkuara, si pjesë e përpjekjeve për të zgjeruar prodhimin vendor dhe për të shmangur tarifat e ashpra mbi importet e çipeve të paralajmëruara nga presidenti Donald Trump.

Kjo lëvizje vjen pas një zotimi të mëhershëm prej 500 miliardë dollarësh që Apple e kishte bërë për të forcuar prezencën në SHBA. Programi i ri “American Manufacturing Program” synon të sjellë më shumë komponentë të prodhuar në SHBA në produktet e Apple, përfshirë çipe, xham për iPhone dhe Apple Watch, dhe teknologjinë Face ID.

Apple planifikon të prodhojë 19 miliardë çipe në 24 fabrika në 12 shtete amerikane deri në vitin 2025, duke bashkëpunuar me kompani si Corning, Coherent, Broadcom dhe Samsung.

Në një event në Shtëpinë e Bardhë, presidenti Trump deklaroi se kompanitë që prodhojnë në SHBA nuk do të preken nga tarifat 100% për çipat e importuar, duke inkurajuar gjigantët e teknologjisë të zhvendosin më shumë prodhim në vend.

CEO i Apple, Tim Cook, e falënderoi presidentin për mbështetjen, dhe tha se kompania do të vazhdojë të fokusohet në ndërtimin e një zinxhiri të plotë të prodhimit të çipeve në SHBA – nga dizajni deri te paketimi.

Megjithëse prodhimi i plotë i iPhone në SHBA mbetet një sfidë për shkak të kostos dhe mungesës së fuqisë punëtore të specializuar, Apple është duke zhvendosur një pjesë të konsiderueshme të proceseve të prodhimit në vend.

Ky investim vjen në një kohë kur administrata Trump po shton presionin për rritjen e prodhimit vendor, ndërsa kompanitë teknologjike si TSMC, Nvidia dhe Texas Instruments kanë njoftuar gjithashtu investime miliardëshe në SHBA.