Presidenti i Shteteve të Bashkuara, Donald Trump, ka firmosur një urdhër ekzekutiv për të thjeshtuar rregulloret federale që rregullojnë nisjet e raketave komerciale – një hap që pritet t’i sjellë përfitime të mëdha kompanisë SpaceX të Elon Musk dhe bizneseve të tjera private të hapësirës.

Sipas Shtëpisë së Bardhë, urdhri i ri udhëzon Sekretarin e Transportit të shfuqizojë ose të përshpejtojë proceset e vlerësimeve mjedisore për licencat e lëshimit të administruara nga Administrata Federale e Aviacionit (FAA), si dhe të eliminojë “rregullat e vjetruara, të panevojshme ose tepër kufizuese” për mjetet e lëshimit dhe rikthimit në Tokë.

Trump theksoi se procedurat e ngadalta të miratimit pengojnë investimet dhe inovacionin, duke kufizuar aftësinë e kompanive amerikane për të udhëhequr tregjet globale të hapësirës.

Megjithëse SpaceX nuk u përmend me emër në urdhër, kompania e Musk është lider absolut në SHBA për nga numri i nisjeve, duke punuar për rrjetin e saj të satelitëve, për NASA-n, Pentagonin dhe klientë të tjerë. Edhe kompania Blue Origin e Jeff Bezos mund të përfitojë nga një regjim më i lehtësuar rregullator.

Musk ka kritikuar shpesh se studimet e ndikimit mjedisor dhe hetimet pas incidenteve ngadalësojnë testimin e raketës së tij gjigante Starship, e cila është pjesë kyçe e planeve të NASA-s për kthimin e astronautëve në Hënë dhe dërgimin e misioneve të ekuipazhit drejt Marsit.

FAA ka ndërprerë disa herë fluturimet testuese të Starship pas shpërthimeve dhe incidenteve që kanë shkaktuar rënie mbeturinash dhe devijime të fluturimeve ajrore. Kjo ka sjellë zgjerimin e zonave të sigurisë ajrore përgjatë trajektoreve të raketës para se të licencoheshin fluturime të reja.//Reuters