Pavarësisht suksesit të jashtëzakonshëm me albumin I’m the Problem, i cili qëndron në krye të Billboard 200 prej 11 javësh, Morgan Wallen nuk do ta paraqesë muzikën e tij për vlerësim në çmimet Grammy 2026.

Sipas Billboard, asnjë nga këngët e 32-vjeçarit nuk do të dorëzohet për ndonjë kategori në ceremoninë e shkurtit të ardhshëm. Lajmi u raportua fillimisht nga Hits Daily Double, ndërsa Billboard konfirmoi se përjashtimi përfshin të gjithë projektet e tij – jo vetëm albumin.

Megjithatë, artistët që janë pjesë e albumit, përfshirë Post Malone, Tate McRae, Eric Church dhe HARDY, mund të dorëzojnë këngët e tyre individualisht.

Kjo vjen pas një historie problematike me çmimet, pasi Wallen u përjashtua për një vit nga ACM dhe CMA Awards në 2021, pas publikimit të një videoje ku ai përdorte një fyerje racore. Edhe pse u pezullua nga etiketa dhe radiot, Grammy-t nuk e kishin ndaluar kurrë nga pjesëmarrja.

Deri më tani, Wallen ka marrë vetëm dy nominime Grammy – të dyja për duet me Post Malone në hitin I Had Some Help.
Në një intervistë të mëparshme, Wallen ka pranuar se nuk ka justifikim për sjelljen e tij, duke thënë:

“E kam futur veten në një situatë shumë të keqe. Nuk jam ai njeri që njerëzit mendonin se isha, por e kuptoj gabimin që bëra.”
Wallen i bashkohet një liste në rritje artistësh që kanë refuzuar të marrin pjesë në Grammy, përfshirë The Weeknd dhe Drake, të cilët u tërhoqën pas ndjesisë se ishin anashkaluar nga Akademia.