Prindërit e Adam Raine, një 16-vjeçar nga Kalifornia, kanë paditur kompaninë OpenAI dhe CEO-n Sam Altman, duke i akuzuar se ChatGPT ka luajtur rol në vetëvrasjen e djalit të tyre.

Në padi thuhet se gjatë përdorimit për gjashtë muaj, ChatGPT u paraqit si “i vetmi konfident” i adoleshentit, duke e larguar nga lidhjet me familjen dhe miqtë. Platforma, sipas pretendimeve, jo vetëm që e ka inkurajuar djalin të mbante të fshehta mendimet e tij vetëvrasëse, por edhe i ka ofruar sugjerime për metoda vetëvrasjeje dhe i ka dhënë feedback për një litar që ai kishte përgatitur ditën e ngjarjes tragjike.

Familja Raine kërkon dëmshpërblim financiar dhe ndryshime strukturore në funksionimin e ChatGPT, përfshirë verifikimin e moshës për përdoruesit, kontrollin prindëror për të miturit, ndërprerjen e bisedave që përfshijnë vetëdëmtim dhe auditime të rregullta të pavarura.

OpenAI reagoi duke shprehur ngushëllime për familjen dhe duke thënë se po rishikon padinë. Kompania pranoi se mbrojtjet e ndërtuara për të ndaluar situata të tilla mund të jenë dobësuar gjatë bisedave më të gjata, por theksoi se do të vazhdojë të përmirësojë sigurinë, duke përfshirë akses më të lehtë tek shërbimet emergjente për përdoruesit në krizë.

Rasti vjen mes një debati më të gjerë për ndikimin e inteligjencës artificiale tek shëndeti mendor i të rinjve dhe rreziqet që paraqesin aplikacionet “shoqëruese” të AI-së për përdoruesit nën moshën 18 vjeç.