Jessie J anulon datat e turneut në SHBA për shkak të trajtimit të kancerit

Muzikë | 29.08.2025 Ora 9:47

Këngëtarja Jessie J ka njoftuar anulimin e datave të saj në turneun amerikan, pasi duhet të nënshtrohet një trajtimi tjetër për kancer. Ajo ka treguar se pas një mastektomie për heqjen e një gjoksi, do t’i duhet një operacion i dytë, i cili sipas saj “nuk është diçka serioze, por duhet të bëhet deri në fund të vitit”.

Operacioni bie në mes të datave të turneut evropian në tetor, të cilat do të riorganizohen, ndërsa koncertet në SHBA janë të anuluara për shkak të përplasjes me kalendarin. Jessie J u shpreh: “Më vjen shumë keq, ndihem e frustruar dhe e trishtuar, por duhet të jem mirë dhe e shëruar, ky është vendimi i duhur.”

Ajo ka qenë transparente me ndjekësit e saj mbi diagnozën dhe procesin e rikuperimit pas kancerit.