Sot, me bum-in e inteligjencës artificiale, kërkesa për faqe interneti me prapashtesën .ai është shpërthyer. Numri i këtyre domeneve është rritur mbi dhjetëfish në pesë vitet e fundit, duke kaluar 850 mijë regjistrime. Vetëm në vitin 2024, Anguilla fitoi 105.5 milionë dollarë të Karaibeve Lindore (rreth 39 milionë dollarë amerikanë) nga shitja e domeneve – pothuajse një të katërtën e të ardhurave të saj shtetërore.

Ndër blerjet më të shtrenjta ishte ajo e sipërmarrësit amerikan Dharmesh Shah, i cili pagoi 700 mijë dollarë për adresën you.ai. Në ankande të tjera, emra si cloud.ai dhe law.ai janë shitur për qindra mijëra dollarë.

Kjo rritje e jashtëzakonshme po ndihmon ekonominë e ishullit, i cili tradicionalisht mbështetet te turizmi, por që është i cenueshëm nga stuhitë e shpeshta të Atlantikut. Diversifikimi i të ardhurave me shitjen e domeneve pritet t’i japë Anguillës më shumë stabilitet financiar, duke mundësuar investime në infrastrukturë, shëndetësi dhe ndërtimin e një aeroporti të ri.

Nga një kod i zakonshëm interneti në vitet ’80, .ai sot është kthyer në një motor zhvillimi për një nga ishujt më të vegjël të Karaibeve – dhe një shembull i qartë se si teknologjia mund të ndryshojë fatet e një vendi.