Bashkimi Evropian ka ndaluar përdorimin e trimethylbenzoyl diphenylphosphine oxide (TPO), një përbërës kimik i përdorur në disa llakëra me xhel dhe produkte kozmetike, pasi është klasifikuar si “substancë toksike për riprodhimin”.

TPO përdorej si fotoiniciator – një substancë që aktivizohet nga drita UV për të forcuar llakun e thonjve. Sipas ekspertëve, rreziku më i madh është për punonjëset e salloneve dhe për konsumatorët që përdorin shpesh manikyrin me xhel. Studimet mbi kafshët kanë treguar lidhje me probleme në fertilitet dhe anomali testikulare.

Megjithatë, ekspertët theksojnë se nuk ka arsye për panik, pasi ekspozimi i konsumatorëve nuk ndodh në të njëjtën mënyrë si në testimet laboratorike. Përveç kësaj, shumë kompani tashmë kanë nisur të përdorin alternativa më të sigurta në vend të TPO-së.

E rëndësishme për konsumatorët është se manikyri me xhel nuk është ndaluar, por vetëm produktet që përmbajnë TPO. Sipas Komisionit Evropian, produktet ekzistuese duhet të tërhiqen nga tregu, ndërsa ato të reja nuk do të lejohen të qarkullojnë më.

Në Mbretërinë e Bashkuar ndalimi pritet të hyjë në fuqi vitin e ardhshëm, ndërsa në SHBA ky përbërës ende përdoret, pasi FDA ka një qasje më “prit e shih” krahasuar me Evropën, që shpesh vepron në mënyrë parandaluese.

Për konsumatorët që duan siguri, mbetet gjithmonë opsioni i llakut klasik, i cili përdoret që nga vitet 1920 dhe ka një histori të gjatë përdorimi të sigurt.