Inflacioni në Shtetet e Bashkuara është rritur në gusht në nivelin 2.9% krahasuar me një vit më parë, duke shënuar ritmin më të lartë të vitit, sipas të dhënave të fundit të Departamentit Amerikan të Punës. Ky zhvillim vjen në prag të mbledhjes së Rezervës Federale, ku do të vendoset për uljen ose mbajtjen e normave të interesit.

Rritja e çmimeve lidhet kryesisht me shtrenjtimin e makinave, mobiljeve të shtëpisë dhe produkteve ushqimore bazë. Në veçanti, domatet u shtrenjtuan me 4.5% në gusht, pasi SHBA vendosi tarifa 17% mbi importet nga Meksika – vend që furnizon rreth 70% të konsumit amerikan të domateve.

Ekonomistët theksojnë se politikat tregtare dhe kufizimet e emigracionit të administratës Trump po ndikojnë drejtpërdrejt tek çmimet, duke ulur fuqinë blerëse të konsumatorëve.

Ndërkohë, tregu i punës ka treguar shenja dobësimi, me vetëm 22,000 vende pune të reja në gusht dhe një rritje të lehtë të papunësisë në 4.3%.

Megjithatë, analistët presin që Fed të ulë normat e interesit me një çerek përqindje javën e ardhshme, duke marrë parasysh presionin e dyfishtë të inflacionit dhe dobësimin e tregut të punës.