Elton John ka folur hapur për betejën e tij me problemet e shikimit, duke zbuluar se humbja e shikimit në syrin e djathtë dhe dëmtimi i të majtit pas një infeksioni në vitin 2024 e kanë bërë vitin e fundit një nga periudhat më të vështira të jetës së tij. Në një intervistë për revistën Variety, muzikanti 78-vjeçar tregoi se 15 muajt e fundit ka qenë thuajse i paaftë të shihte apo lexonte, duke e përshkruar situatën si “shkatërruese”.

Artisti bëri të ditur se infeksioni në sy gjatë pushimeve verore në Francë preku të dy sytë, duke e lënë me shikim shumë të dobët. Megjithatë, pavarësisht sfidave, Elton John ruan pozitivitetin dhe shpresën se përparimet në mjekësi do t’i ndihmojnë një ditë të përmirësojë gjendjen e tij. Ai theksoi se durimi dhe forca emocionale janë bërë të domosdoshme në këtë periudhë.

Këngëtari pranoi se vështirësitë me shikimin kanë ndikuar edhe në jetën e tij familjare, sidomos në rolin e tij si prind. Në deklaratat e mëparshme, ai ka treguar se i mungon aftësia për të parë djemtë e tij duke luajtur sport dhe kjo e ka bërë situatën edhe më të dhimbshme.

Megjithatë, Eltoni thotë se ndihet me fat që ka familjen pranë dhe një karrierë të jashtëzakonshme pas vetes. Ai theksoi se, pavarësisht sfidave, nuk ka ndërmend të heqë dorë nga shpresa dhe mbetet i vendosur të përballojë çdo pengesë me stoicizëm dhe forcë.