Aktorët e sagës “Harry Potter” u rritën para syve të publikut, por kalimi nga fëmijë magjistarë në karriera të pavarura ka qenë sfidues për shumë prej tyre. Për t’u shkëputur nga imazhi i Hogwartsit, disa kanë zgjedhur role të guximshme, provokuese dhe shpesh kontroverse, duke kërkuar të ndryshojnë perceptimin që publiku ka pasur për ta ndër vite.

Rasti më i fundit është Harry Melling, i njohur si Dudley Dursley. 36-vjeçari u shfaq në dramën romantike gej “Pillion”, e cila debutoi me skena eksplicite BDSM, aq të forta sa u moderuan për publikun në Festivalin e Kanës. Regjisori ka pranuar se disa pamje grafike seksuale u hoqën për të shmangur tronditjen e audiencës. Melling, i cili ka humbur rreth 33 kilogramë që prej kohës së Potter, ka deklaruar se dëshiron të largohet nga imazhi i vjetër: “Duhet të ecësh përpara… shpresoj që ajo gjëja me Potterin të zhduket ngadalë.”

Ai nuk është i vetëm në këtë rrugë. Daniel Radcliffe bëri një nga kthesat më të forta menjëherë pas sagës me rolin në shfaqjen teatrale “Equus”, ku u shfaq lakuriq në skenë për rreth 10 minuta. Radcliffe e ka përshkruar këtë si një mënyrë për t’u çliruar nga kufizimet e imazhit të Harry Potter-it dhe për të fituar besim në trupin dhe lojën e tij, duke shtuar se akti e ndihmoi të kapërcente barrierat psikologjike.

Shembujt e Melling, Radcliffe dhe kolegëve të tjerë tregojnë një trend të qartë: yjet e dikurshëm të fëmijërisë po ndërtojnë identitete të reja artistike përmes roleve të forta dhe shpesh provokuese, edhe nëse kjo do të thotë të largohen plotësisht nga bota magjike që i bëri të famshëm.