Viti i ri ka nisur me rezultate shumë pozitive për industrinë e filmit, duke shënuar fundjavën më të suksesshme të Vitit të Ri në box office që nga pandemia. Filmave të festave po u zgjatet suksesi edhe përtej pushimeve.

Në krye të listës qëndron “Avatar: Fire and Ash” i James Cameron, i cili ka kaluar pragun e 1 miliard dollarëve në fitime globale. Filmi ka grumbulluar rreth 303 milionë dollarë në Amerikën e Veriut dhe mbi 770 milionë dollarë ndërkombëtarisht, duke konfirmuar edhe një herë fuqinë e markës Avatar.

Ky është një tjetër sukses madhor për Cameron-in, i cili tashmë ka realizuar tre nga katër filmat më fitimprurës në historinë e kinemasë botërore.

Disney vazhdon dominimin me “Zootopia 2”, që ka kaluar 1.55 miliard dollarë dhe është bërë filmi më fitimprurës i Walt Disney Animation Studios deri më tani. Filmi ka thyer rekorde edhe në tregun kinez, ku ka rezultuar animacioni hollywoodian më i suksesshëm ndonjëherë.

Ndërkohë, thriller-i “The Housemaid” nga Lionsgate po shënon rezultate të forta në tregun amerikan dhe ndërkombëtar, ndërsa “Marty Supreme” nga A24, me Timothée Chalamet në rolin kryesor, është cilësuar si një nga surprizat më të mëdha të sezonit të festave.

Rezultatet tregojnë se publiku është rikthyer fuqishëm në kinema dhe se industria e filmit po shënon një fillim shumë premtues për vitin 2026.