Dy vite pas publikimit të “The Marvels”, regjisorja Nia DaCosta ka ndarë një këndvështrim surprizues mbi filmin që u kthye në dështimin më të madh financiar në historinë e Marvel Cinematic Universe.

Në një intervistë për Deadline, DaCosta theksoi se, pavarësisht rezultateve zhgënjyese në box office dhe reagimeve të përziera nga kritikët dhe fansat, ajo ndihet mirënjohëse për përvojën dhe marrëdhëniet profesionale që krijoi gjatë realizimit të filmit. Sipas saj, të gjithë u përpoqën maksimalisht për të bërë një film sa më të mirë.

Regjisorja zbuloi gjithashtu se këto lidhje vazhdojnë edhe sot, duke përmendur vizitën e saj në xhirimet e “Avengers: Doomsday”, ku u ribashkua me producentë, regjisorët Joe dhe Anthony Russo, si dhe miq që janë pjesë e projektit.

Megjithëse “The Marvels” arkëtoi vetëm 206 milionë dollarë kundrejt një buxheti prej rreth 270 milionësh, filmi pati një rol të rëndësishëm në ndërtimin e sagës së multiversit, duke rikthyer personazhin Beast në skenën pas titrave.

Ndërsa DaCosta ka qenë e hapur edhe për vështirësitë gjatë procesit të realizimit, ajo e sheh “The Marvels” si një eksperiencë që kontribuoi në zhvillimin e saj profesional dhe në drejtimin e ardhshëm të universit Marvel.