Dizajneri i njohur italian Valentino Garavani, një nga figurat më të rëndësishme të modës botërore, ka ndërruar jetë në moshën 93-vjeçare, ka njoftuar Fondacioni Valentino Garavani dhe Giancarlo Giammetti.

Sipas njoftimit zyrtar, Valentino u nda nga jeta paqësisht në shtëpinë e tij në Romë, i rrethuar nga familja. Ai do të vendoset për homazhe në Piazza Mignanelli në Romë më 21 dhe 22 janar, ndërsa ceremonia mortore do të mbahet më 23 janar në Bazilikën “Santa Maria degli Angeli e dei Martiri”.

I lindur në Lombardi në vitin 1932, Valentino bashkëthemeloi shtëpinë e modës Valentino në vitin 1960 dhe u shndërrua në simbol të luksit, elegancës dhe glamour-it. Krijimet e tij janë veshur nga figura ikonike të politikës, kinemasë dhe botës së artit.

Valentino konsiderohet një nga dizajnerët e fundit të epokës së artë të modës, me një trashëgimi që ka formësuar standardet e bukurisë dhe elegancës për dekada me radhë.