Një studim i realizuar nga psikologë të Universitetit të Amsterdamit ka treguar se pyetjet e menduara mirë dhe bisedat e thella mund të rrisin ndjeshëm ndjenjën e dashurisë dhe mbështetjes tek fëmijët.

Hulumtimi, i zhvilluar në vitin 2024, përfshiu fëmijë të moshës 8 deri në 13 vjeç dhe prindërit e tyre. Gjatë eksperimentit, prindërit u udhëzuan të bisedonin me fëmijët për rreth 9 minuta, duke përdorur pyetje që nxisnin vetë-shprehjen dhe ndarjen e ndjenjave personale.

Pas bisedës, fëmijët raportuan se ndiheshin më të dashur dhe më të afërt emocionalisht me prindërit e tyre. Studiuesit theksuan se bisedat e thella kanë ndikim më të madh sesa komunikimi sipërfaqësor, i njohur si “small talk”.

Sipas autorëve të studimit, ndarja e mendimeve, frikave dhe përvojave personale krijon lidhje më të forta emocionale dhe ndihmon në ndërtimin e besimit brenda familjes.

Studimi sugjeron se nuk është sasia e kohës, por cilësia e komunikimit ajo që forcon marrëdhëniet mes prindërve dhe fëmijëve.