Superylli kolumbiane Shakira mbajti të dielën një koncert falas në Mexico City, duke mbledhur mbi 400 mijë njerëz në sheshin historik Zócalo, një rekord i ri pjesëmarrjeje për këtë hapësirë, sipas Associated Press.

Shakira performoi për rreth dy orë, duke sjellë hitet më të njohura të karrierës dhe duke ndezur atmosferën mes turmës masive që vallëzonte dhe këndonte së bashku me të. Fansat mbushën çdo cep të sheshit, duke valëvitur flamuj dhe duke treguar përkushtimin e tyre ndaj artistes.

Koncerti ishte pjesë e turneut të saj “Las Mujeres Ya No Lloran”, që ka regjistruar suksese të jashtëzakonshme në Meksikë. Gjatë kësaj faze, Shakira ka mbajtur një seri koncertesh në Estadio GNP Seguros, duke tërhequr qindra mijëra fansa dhe duke vendosur shifra të pazakonta për pjesëmarrjen e publikut. Vetëm në kryeqytet, turneu kishte mbledhur rreth 780 mijë spektatorë përgjatë 13 netëve.