Incidenti i bujshëm gjatë performancës së Sombr në BRIT Awards ka rezultuar të jetë i inskenuar për qëllime promovuese.

Gjatë interpretimit të këngës “Undressed”, një person me bluzë ku shkruhej “Sombr is a homewrecker” u ngjit në skenë dhe e shtyu artistin 20-vjeçar. Sigurimi e largoi menjëherë, ndërsa Sombr vazhdoi performancën. Më vonë, përfaqësuesit e tij konfirmuan për Variety se gjithçka ishte një “stunt” për të promovuar këngën e re “Homewrecker”. Prezantuesi Jack Whitehall reagoi me humor: “Sa keq që nuk e kishim sigurinë gati.”

Olivia Dean dominon mbrëmjen

Fituesja e madhe e mbrëmjes ishte Olivia Dean, e cila mori katër çmime, në ceremoninë e mbajtur për herë të parë në Manchester. Ajo fitoi “Kënga e Vitit” për duetin “Rein Me In” me Sam Fender, si dhe “Best Pop Act”, “British Artist of the Year” dhe “British Album of the Year” për albumin The Art of Loving.

Sam Fender fitoi gjithashtu çmimin “Best Alternative/Rock Act”.

Fitues të tjerë dhe rekorde historike

Lola Young fitoi çmimin e saj të parë BRIT si “Best Breakthrough Act”.
Rosalía bëri histori si artistja e parë që fiton me muzikë në gjuhë të huaj, ndërsa Rosé u bë artistja e parë e K-pop që fiton një BRIT për “International Song of the Year” me “APT”, në bashkëpunim me Bruno Mars.

Ndër fituesit e tjerë ishin Wolf Alice (Group of the Year), Dave (Best Hip Hop/Grime/Rap Act), si dhe Mark Ronson, i cili mori çmimin “Outstanding Contribution to Music”.

Ceremonia u hap nga Harry Styles, i cili u rikthye në skenë pas tre vitesh, ndërsa Dua Lipa bëri një paraqitje surprizë.

Në mesin e çmimeve të tjera, u nderuan edhe Noel Gallagher (Songwriter of the Year) dhe Ozzy Osbourne me çmimin për arritje jetësore.