ASK-ja bën të ditur se rritja e çmimeve është ndikuar kryesisht nga shtrenjtimi i produkteve ushqimore, shërbimeve dhe disa kategorive të transportit.

Produktet bazë si mishi, pemët, perimet, buka dhe drithërat kanë shënuar rritje të ndjeshme. Sipas të dhënave të ASK-së, çmimi i mishit të viçit është rritur për rreth 23 për qind, duke arritur në rreth 12.90 euro për kilogram, krahasuar me 10.47 euro një vit më parë.

Ekonomisti Edison Jakurti thekson se Kosova është shumë e varur nga importet dhe për këtë arsye zhvillimet në tregjet ndërkombëtare ndikojnë shpejt edhe në çmimet në vend.

Sipas tij, konfliktet gjeopolitike, veçanërisht në Lindjen e Mesme, mund të shkaktojnë rritje të çmimit të naftës dhe të krijojnë efekte zinxhirore në transport, prodhim dhe në koston e përgjithshme të jetesës në muajt në vijim.