Një ekip studiuesish nga Universiteti i Karolinës së Veriut ka propozuar shtimin e një ngjyre të re në semaforë – dritës së bardhë – si pjesë e një sistemi të ri për menaxhimin e trafikut në epokën e automjeteve autonome.

Sipas modelit të propozuar, “faza e bardhë” nuk do të zëvendësonte sinjalet ekzistuese, por do të funksiononte si shtesë, duke u aktivizuar kur në një kryqëzim ka mjaftueshëm automjete autonome. Në këtë rast, drita do t’u tregonte shoferëve të ndjekin automjetin përpara, duke mundësuar koordinim automatik të qarkullimit.

Kur numri i automjeteve autonome është i ulët, sistemi do të vazhdojë të funksionojë me semaforët klasikë.

Simulimet e studiuesve tregojnë se edhe me 10% automjete autonome, mbingarkesa në trafik mund të ulet rreth 3%, ndërsa me 30% ky reduktim mund të arrijë deri në 11%.

Megjithatë, zbatimi i kësaj ideje përballet me sfida, përfshirë kostot e larta të infrastrukturës dhe nevojën për sisteme të avancuara komunikimi mes automjeteve dhe rrugëve.

Studiuesit propozojnë që fillimisht të testohen pilot-projekte në zona të kontrolluara si kampuse universitare, porte apo qendra logjistike.