Çmimet e fluturimeve në Evropë kanë shënuar rritje të ndjeshme, si pasojë e shtrenjtimit të karburantit për avionë, i lidhur me ndërprerjet në furnizimin me naftë dhe tensionet gjeopolitike.

Sipas organizatës Transporti dhe Mjedisi (T&E), fluturimet e distancave të gjata janë rritur mesatarisht me rreth 88 euro për pasagjer, ndërsa ato brenda Evropës me rreth 29 euro. Në raste konkrete, një udhëtim nga Barcelona në Berlin kushton rreth 26 euro më shumë, ndërsa një fluturim nga Parisi në Nju Jork është shtrenjtuar me rreth 129 euro vetëm për shkak të karburantit.

Kompanitë ajrore po përballen me presion të madh financiar, pasi çmimi i karburantit për avionë ka kaluar 100 dollarë për fuçi. Ekziston gjithashtu rreziku për mungesa në furnizim, që mund të çojnë edhe në anulime fluturimesh.

Linjat ajrore si Lufthansa, Ryanair dhe Air France-KLM kanë paralajmëruar se kostot në rritje mund të reflektohen drejtpërdrejt në çmimet për pasagjerët nëse situata vazhdon.

Ndërkohë, Bashkimi Evropian po shqyrton masa për menaxhimin e furnizimeve me karburant dhe rritjen e investimeve në alternativa më të qëndrueshme, me qëllim uljen e varësisë nga nafta në të ardhmen.