Tregu i veturave elektrike në Indi po shënon rritje të ndjeshme, duke sinjalizuar një kalim gradual drejt përdorimit më të gjerë të automjeteve elektrike.

Sipas të dhënave të fundit, shitjet e veturave elektrike janë rritur me 25% gjatë vitit të fundit, ndërsa për herë të parë kanë kaluar pragun prej 5% të tregut të përgjithshëm të veturave të pasagjerëve – një nivel që konsiderohet si pikë kthese për adoptim masiv.

Rritja po vërehet veçanërisht te veturat më të mëdha dhe më të shtrenjta, ku një në çdo dhjetë vetura të shitura tashmë është elektrike. Ndërkohë, motorët elektrikë dhe mjetet me tri rrota po fitojnë gjithashtu popullaritet.

Ekspertët thonë se rritja e çmimeve të karburanteve, politikat e reja mjedisore dhe modelet e reja më të përballueshme po ndikojnë në interesimin e qytetarëve për automjete elektrike.

Megjithatë, sfidë mbetet infrastruktura për mbushje, pasi India ende ka shumë më pak pika karikimi krahasuar me vende si Kina apo shtetet evropiane.