Drejtori ekzekutiv i Meta, Mark Zuckerberg, ka pranuar se zhvillimi i inteligjencës artificiale në kompani nuk ka ecur me ritmin e parashikuar, ndërsa ristrukturimi i gjerë i ndërmarrë këtë vit nuk ka dhënë rezultatet e pritura.

Gjatë një takimi të brendshëm me punonjësit, një regjistrim i të cilit u sigurua nga Reuters, Zuckerberg tha se pritshmëritë për zhvillimin e të ashtuquajturve "agjentë të inteligjencës artificiale" nuk janë përmbushur.

Ai theksoi se riorganizimi i kompanisë, i cili përfshiu shkurtime të konsiderueshme të vendeve të punës dhe transferimin e mijëra punonjësve në ekipet e inteligjencës artificiale, nuk u realizua aq mirë sa ishte planifikuar.

"Në retrospektivë, ristrukturimi nuk ishte aq i organizuar sa mund të kishte qenë dhe ne nuk e vlerësuam saktë kohën e nevojshme për këto ndryshime", u shpreh Zuckerberg.

Në muajin maj, Meta reduktoi rreth 10 për qind të fuqisë së saj punëtore në nivel global dhe ricaktoi afro 7 mijë punonjës në ekipe të fokusuara në zhvillimin e inteligjencës artificiale. Këto ndryshime shkaktuan pakënaqësi mes stafit dhe ngritën shqetësime për moralin e punonjësve.

Sipas Zuckerberg, drejtuesit e kompanisë kishin besuar se zhvillimi i "agjentëve të inteligjencës artificiale" – sisteme që mund të kryejnë detyra në mënyrë autonome në emër të përdoruesve – do të përparonte shumë më shpejt.

"Trajektorja e zhvillimit gjatë katër muajve të fundit nuk është përshpejtuar në mënyrën që prisnim dhe disa nga investimet tona ende nuk kanë dhënë rezultatet e dëshiruara", tha ai.

Megjithatë, kreu i Meta-s mbetet optimist. Ai u shpreh se kompania pritet të nisë të shohë përfitime më të dukshme nga investimet në inteligjencën artificiale brenda tre deri në gjashtë muajve të ardhshëm.

Meta planifikon të investojë deri në 145 miliardë dollarë gjatë këtij viti në infrastrukturën e inteligjencës artificiale, duke qenë një nga kompanitë që po investon më agresivisht në këtë teknologji. Këto investime janë pjesë e strategjisë së kompanisë për të përmirësuar efikasitetin dhe për të forcuar pozicionin e saj në garën globale të inteligjencës artificiale.

Në të njëjtin takim, drejtori i teknologjisë i Meta, Andrew Bosworth, foli edhe për programin e diskutueshëm që monitoronte aktivitetin e punonjësve në kompjuterët e kompanisë për të mbështetur zhvillimin e modeleve të inteligjencës artificiale.

Sipas tij, hetimi i brendshëm nuk ka gjetur prova se të dhënat personale të punonjësve janë përdorur për trajnimin e modeleve të inteligjencës artificiale.

Bosworth shtoi se, nëse programi do të rikthehet në përdorim pas përfundimit të hetimit, pjesëmarrja e punonjësve do të jetë vullnetare.

"Për ata që ndihen rehat të kontribuojnë, kjo do të jetë një mundësi. Ata që nuk dëshirojnë të marrin pjesë, nuk do të jenë të detyruar", tha ai.