Deutsche Bahn, kompania shtetërore hekurudhore e Gjermanisë, do të ndalojë konsumimin e alkoolit në të gjitha 5,400 stacionet e trenave, duke filluar nga mesi i tetorit.

Sipas rregullit të ri, pirja e alkoolit nuk do të lejohet në platformat dhe hollet e stacioneve, ndërsa do të vazhdojë të jetë e lejuar vetëm në restorantet dhe baret që ndodhen brenda tyre.

Kompania thotë se masa synon të rrisë sigurinë dhe të zvogëlojë incidentet e lidhura me konsumimin e alkoolit.

Një praktikë e tillë tashmë zbatohet në stacionet kryesore të qyteteve si Frankfurti, Këlni dhe Hamburgu, ku rezultatet kanë qenë pozitive.

Personat që shkelin vazhdimisht këtë rregull mund të përballen me ndalim të përhershëm të hyrjes në stacionet hekurudhore.