Malisheva ka regjistruar një fitore të madhe me rezultat 2-0 ndaj skuadrës skoceze Hibernian në ndeshjen e parë të rundit të dytë kualifikues të UEFA Conference League, e zhvilluar në stadiumin “Fadil Vokrri” në Prishtinë. 

Skuadra kosovare dominoi takimin dhe kaloi në epërsi në minutën e 21-të, kur Kreshnik Uka realizoi pas asistimit të Arlind Veliut. Kur pritej vërshëllima përfundimtare, Valmir Nafiu vulosi fitoren me golin e shënuar në minutën e 90-të, duke i dhënë Malishevës një avantazh të rëndësishëm për ndeshjen e kthimit. 

Me këtë triumf, Malisheva është vetëm një ndeshje larg kualifikimit historik në rundin e tretë kualifikues të UEFA Conference League. Ndeshja e kthimit në Skoci do të vendosë skuadrën që do të vazhdojë më tej në garat evropiane.