Kina ka vendosur kufizime të reja për aplikacionet e inteligjencës artificiale që krijojnë marrëdhënie emocionale me përdoruesit, duke ndaluar përdorimin e tyre nga të miturit.

Vendimi vjen pas shqetësimeve se këto platforma mund të krijojnë varësi emocionale dhe të ndikojnë në mënyrën se si njerëzit lidhen me të tjerët në jetën reale.

Disa përdorues në Kinë kanë treguar se janë lidhur shumë me “shoqëruesit” e tyre virtualë, duke i përdorur për mbështetje emocionale, biseda të përditshme apo edhe si zëvendësim të njerëzve të afërt.

Ekspertët paralajmërojnë se, edhe pse inteligjenca artificiale mund të ofrojë mbështetje dhe shoqëri, ajo mund të sjellë rreziqe si varësia, manipulimi emocional dhe problemet me privatësinë.

Kina nuk është vendi i vetëm që po kërkon rregulla më të forta për AI-në. Edhe Bashkimi Evropian dhe disa shtete në SHBA kanë ndërmarrë hapa për të kufizuar përdorimin e këtyre teknologjive, veçanërisht te fëmijët.