Shifrat

Sipas Meta, mes dhjetorit dhe qershorit janë çaktivizuar 462,000 llogari të dyshuara në Instagram dhe 294,000 llogari të dyshuara në Facebook. Këto shifra janë në rritje krahasuar me janarin, kur kompania kishte raportuar 331,000 llogari të fshira në Instagram dhe 173,000 në Facebook.

Konteksti: ligji australian

Ligji hyri në fuqi më 10 dhjetor. Qeveria australiane e propozoi për shkak të shqetësimeve mbi ndikimin e rrjeteve sociale te shëndeti fizik dhe mendor i fëmijëve dhe adoleshentëve. Kompania e teknologjisë më e madhe në botë në fushën e rrjeteve sociale ka thënë se dëshiron ta respektojë ligjin, edhe pse së bashku me platforma të tjera e ka kundërshtuar hapur.

Ndërkohë, rregullatori australian i internetit po shqyrton një padi zbatimi kundër disa platformave, përfshirë disa në pronësi të Meta-s. Sipas rregullatorit, këto platforma nuk kanë ndërmarrë hapa të mjaftueshëm për t'iu përshtatur ligjit.

Asnjë platformë tjetër nuk ka publikuar të dhëna përputhshmërie që mbulojnë të njëjtën periudhë si Meta. Megjithatë, të dhënat e qeverisë australiane dhe disa studime të pavarura kanë treguar se mbi 8 në 10 adoleshentë nën 16 vjeç ishin ende aktivë në rrjetet sociale gjatë tre muajve të parë të ndalimit.

Gjoba të dyfishuara

Vende të tjera në botë po shqyrtojnë kufizime të ngjashme moshe. Australia i ka akuzuar platformat se e kanë krijuar qëllimisht ndalimin në mënyrë që të dështojë. Vendi ka miratuar një ligj që dyfishon gjobën maksimale për mospërputhshmëri, në 99 milionë dollarë australianë (rreth 69.75 milionë dollarë amerikanë), dhe i jep rregullatorit fuqi më të mëdha për të kërkuar dokumentacion.

Seancë parlamentare të premten

Përfaqësues të Meta-s, TikTok-ut, Google-it (pronare e YouTube) dhe Snap-it (Snapchat) do të dëshmojnë të premten në një hetim parlamentar mbi këto ndryshime, bashkë me zyrtarë rregullatorë dhe qeveritarë.

"Zbatimi është në vazhdim e sipër, dhe këto shifra do të vazhdojnë të rriten," tha Meta në një deklaratë. "Ndajmë të njëjtin qëllim me qeverinë australiane: të sigurojmë që të rinjtë të kenë përvoja online të sigurta dhe të përshtatshme për moshën. Ne po i përmbushim detyrimet tona sipas ligjit," shtoi kompania.

Si funksionon verifikimi i moshës

Një provë e kryer në Australi në 2025 me teknologji verifikimi moshe zbuloi se produktet në treg mund ta mbështesnin në mënyrë efektive ndalimin. Shumica e platformave të mëdha, përfshirë Meta-n, kanë vendosur softuer për vlerësimin e moshës bazuar në foto. Sipas tyre, fillimisht përdoruesit u nënshtrohen procesit të "inferimit të moshës", pra vlerësimit të moshës bazuar në aktivitetin e tyre online.

Meta tha se po përdor inteligjencën artificiale për të analizuar profilet e përdoruesve. Sistemi kërkon "tregues kontekstualë që një llogari mund t'i përkasë dikujt nën 16 vjeç, si festimet e ditëlindjes apo përmendjet e klasës shkollore", dhe analizon raportimet për llogari të dyshuara nën moshë. Kompania shtoi se ka hequr mundësinë që një person të provojë sërish të krijojë llogari, nëse llogaria e tij e mëparshme ishte fshirë.