Procesi mësimor në Kosovë pritet të nisë më 1 shtator, ndërsa nga Sindikata e Bashkuar e Arsimit, Shkencës dhe Teknologjisë (SBAShK) kanë bërë të ditur se mësimdhënësit janë të gatshëm për fillimin e vitit të ri shkollor.

Sekretari i SBAShK-ut, Ymer Ymeri, ka shprehur shqetësim për deklaratat në disa komuna se një pjesë e mësimdhënësve mund të konsiderohen “tepricë teknologjike”. Sipas tij, kjo është e pakuptimtë në komunat ku njëkohësisht ka konkurse të hapura për punësimin e mësimdhënësve.

Sa i përket përgatitjeve për vitin e ri shkollor, Ymeri tha se në shumicën e shkollave ato kanë përfunduar, ndërsa në disa të tjera renovimet janë ende duke u përmbyllur.

SBAShK-u ka shprehur gjithashtu shpresën që subvencionimi i teksteve shkollore të realizohet pa vonesa dhe që nxënësit t’i kenë librat me kohë.

Ndërkohë, nga Ministria e Arsimit kanë konfirmuar se mësimi do të fillojë më 1 shtator. Pakënaqësi për mënyrën e subvencionimit të teksteve kanë shprehur edhe nga Këshilli i Prindërve.