Autoritetet braziliane thanë të hënën se ylli i futbollit Neymar u gjobit me 16 milionë reai (3.33 milionë dollarë) për shkeljen e rregullave mjedisore gjatë ndërtimit të rezidencës së tij bregdetare në Brazilin juglindor.

Projekti luksoz shkeli rregullat në lidhje me përdorimin dhe lëvizjen e burimeve të ujërave të ëmbla, shkëmbinjve dhe rërës, pretenduan fillimisht autoritetet lokale në fund të muajit të kaluar dhe konfirmuan të hënën.

Një zëdhënës i Neymar refuzoi të komentojë mbi këtë çështje.

Rezidenca e tij ndodhet në qytetin Mangaratiba në bregun jugor të shtetit Rio de Zhaneiro të Brazilit.

Përveç gjobës, çështja do të hetohet nga Prokuroria e Përgjithshme vendore, Policia Civile e Shtetit dhe zyra e mbrojtjes së mjedisit, ndër organe të tjera të kontrollit të mjedisit.